Gogoratzen al zarete Lopez Arriortua “SuperLopez” euskal enpresariaz? 90etako `pelotazo´ enpresarial eta yupien eredu, ez dakit Wolkswageneko-edo halamoduzko enpresa bateko zuzendaritzakoa izan zen behintzat. “Langile Jauna” kontzeptu xuriaren sortzaile, langileak enpresan ardurak hartzearen, inplikatzearen edo esklabotasun berriaren edota eskabiolakeria zaharren ideologo, gazte baskoen “gau-pasen” aurka azaldu zitzaigun. Zer ez ote luke esango egun, goizalde edo eguerdi arteko afterren aurka...?!

Kontua da, ez dakit legenda urbanoa ote den ala ez, zera esaten zela orain dela urte batzuk: Arzalluzek bere erlojua eskuineko eskuan loturik zeramala, eta hori Arriortuari eginiko promes bati zor zitzaiola, eta ez zuela eskuz aldatuko harik eta Zornotzan lehen harria ipini zuten zelai tzarrean autoen faktoria egin arte. Lerro zuriko autoak egitea zuten xede bi sozio hauek, milioi pezeta inguruko automobil ekonomikoak izango ziren, merkatua jango zutenak, eta, Bizkaiko langileak enplegatuz, aldi berean euren Alderdiko bezeroak segurtatuko zituen negozioak. Ondo lotu zuten operazioa, ziotenez.

Asuntoa da, Arriortua espioitzat salatua izan zela, eta bere aurreko enpresaren eta hurrengo beste estatubatuar baten artean saltsa latzak montatu zituztela urte batzuetan; bere lantoki edo probaleku berria utzi behar izan zuen eta hitzaldiak ematen hasi; predikamendu handia izaki, askok eskatzen zituzten haren aholkuak, baina auzitik auzira zebilen eta bazirudien kartzelan-edo bukatuko zuela. Istripu latz bat izan eta oso gaizki gelditu zela, horixe izan zen beretaz entzun genuen azken gauza. Geroztik ez gara fijatu Arzalluzek zein eskumuturretan lotzen duen erlojuaren uhala, baina badirudi Amorebietako faktoria bertan behera geratu zela.

Handiena duela urtebete ere ez dela irakurri genuen (ezkerreko izateko susmagarria ez den) “D.V.”-n: gure N-1-ean 90etako, demagun, egunero 5.000 kamioi ibiltzetik 2000-etan 10.000tik gora ibiltzeko `kulpantea´ SuperLopez izan zela zioen berriak, luze. Agidanez, berak eta Wolkswagenek Europako hainbat hiriburu eta hirietan biltegiak ez edukitzea erabaki zuten, eta euren kamioiak izatea biltegi-ibilgailu erraldoi, errepideak josiz... Laster eguneroko 15.000 edo 20.000 kamioi/eguneko ibiliko omen dira gure errepideetan, baina, aldekoek diotenez, AHTren merkantzia garraiolari berriarekin kopuru hori murriztuko omen digute. Sinestezina baina gezurra.

Arazoa da, aurrena premiak sortzen dizkigutela eta gero “soluzioak” jarri. Goitik, beti. Hurrengoa, ez da kontua, garabiekin ibiltzen den lagun batek kontatu zidan. Madrilgo M-30 egiteko erabili diren tuneladoratzarren moduko batekin (Europako handiena den milioika kilo eta tonatako, bi zentzutan, makinatzar luze eta zabalarekin) aritu dira zulatzen Madrilgo metroaren adar berri bat, (erdigunean zituen egoitzak saldu eta eraiki berri duen) Telefonicako egoitzaraino daramana, hain zuzen.

Alcobendasen, Mostolesko Supremen herrian ez, baino Alcobendasen (badakizue, 80etatik gaur arte iraun irauten duen “Tarzan y su puta madre buscan piso en Alcobendas punk-rock talde mitikoaren herri-auzoan). Hondeatze lana bukatu dute eta, tuneladora desmontatzea garestiago ateratzen zenez, zer egin jakin ez horrekin, eta metro-adarraren saihetsean beste zulo bat egin espresuki eta hantxe lur eman omen diote tuneladora horri.

Hondamendia hondamendi gainean. Edo azpian. Erabili eta bota. Sator mekanikoak bere lana egin du eta bertan lurperatu: total, “lur azpian bizitzarik ez dagoenez”! Lehendik kalte gutxi egin balu bezala...! Biharko eguneko gizarteak nahiko lan izango du bizitzen, arnasa hartu eta ura edateagatik ere ordaindu beharko dute, eta nahiko lan izango dute halaber bihar-etziko industria-arkeologoek ere. SuperLopez eta AHTren ama guztiek kulparik ez badute ere, haiekin akordatu behar dira gure ilobak!

Jon Arano